Luk 17 | TVK | STEP | Iesu biteni mi moletin nan xil bitene, “Be reitin, sexien xil xa pol ni moletin mot e tesaen ikila ti imei. !E isa pupu mi moletin xa be suse te tesaen xil ak!

Luke 17

Iesu Misep Usil Tesaen

Luk 17:1-4

1 Iesu biteni mi moletin nan xil bitene, “Be reitin, sexien xil xa pol ni moletin mot e tesaen ikila ti imei. !E isa pupu mi moletin xa be suse te tesaen xil ak! 2 Moletin tei xa pol ni tei tesav xa te xeih ti mot e tesaen, bos mak mu vahit lavar hat xa mahulong vate hiraen e laterir ni e tas xa be huinep. Maxani, pangasien xa imei mini ihe mahulong pupu. 3 !Ma ulaxat kuh xouk ve naha xa opol ni!

“Xosxa tumali pol misa minuk, ha ma umal ni. E xosxa xi biles meulien nan ra tesaen ak, ma uketeh ihos mini rilomun. 4 E xosxa xi pol misa minuk be valu e he sav (7) e melengien tei; e melele xil ngasen xa xi pol ni mak, xi bemei visaluk biteni minuk bitene, 'Napol misa pupu li minuk e ninapol ni ti mun vari namak.' Ma bos xa uketeh ihos tang mini.”

Iesu Sep Usil Neketen xa Nggeih

Luk 17:5-6

5 E moletin nan xil labiteni mi suv Iesu labitene, “Pol ni neketen namem vaxeih mu.”

6 Ma xi biteni mi xil bitene, “Neketen namim hokorong tang, vengan xa xosxa neketen namim pipin ni utut vaak tei, ^{▼▼17:6 Luk bit utut mustard del vatit mulberry, e vengan xa mustard del mulberry tovuol inggak, matling utut vaak xa hokorong nggoni utut mustard e vatit vaak xa mahulong mili vatit mulberry.} ma mukila muhiteni mi vatit vaak ak muhitene, '!Put ratuk ra tan ak, e ha, ulih xouk ute tas!' Ma xi iteong ni xamim.”

Sexien Na Moletin te Polien

Luk 17:7-10

7 Iesu biteni mun mi moletin nan xil bitene, “Mukila ngamu sexien na eilep tei xa misil moletin te polien nan tengan ha vapol e naho nan mu valaxat sipsip san xil. Melele xa pol bus, eilep nan misakras vahiteni mini vahit, '!Amei anien!' 8 !E-e, sexien na eilep xil tamak ti! Xi mikila ihiteni mi moletin te polien nan imak, 'Sak mese ni anien avan, ti, using xoles eising nam e uleh anien avan imei. Utatil nou mu nianien, ti, xouk sung.' 9 ?E eilep ak ikila imes moletin te polien nan ve xi di mipol nggusil sepinien nan? E-e, misakras. 10 Ngan ak nggoni xamim tang. Melele xa mupol sen polien xil xa Hi biteni mi xamim tengan mupol ni, muhiteni tang muhitene, 'Xamem mabe moletin votei te polien, e di mapol nggusil naha tang xa Hi di misa ni mi xamem tengan mapol ni.'”

Iesu Pol ni Moletin Hexalu xa Latemesei ni Leporsi ^{▼▼17:11 Leporsi be meseien xa pol ni hilbe moletin di mat, misak ni menuk xa da en bo. Siu xil labit meseien leporsi misa mak mu mili meseien sav xil. Moletin xa ngguri natuxol ti moletin sav. Lalingi da sen nga tang.} Mei Vexil Memese

Luk 17:11-19

11 Melele xa Iesu del moletin nan xil di langgusil suse lave Serusalem, xil ba langgo haxot te provins tahal Sameria xal Kaleli. 12 Melele xa xil lakakao labe metimal tei, labisu ni moletin xil labe hexalu (10) xa lalong pangas xil ve meseien leporsi. Xil ak lasoh ladi sotin 13 e di lakei ba ni Iesu labit, “!Iesu, Suv! !Iem isae li e xamem!”

14 Iesu miketeh pus xil e biteni mi xil bitene, “Muha, mupisen xamim mi pris xil tengan lilepis vemim.” E melele xa langgusil suse labe, meseien nae be reling xil.

15 Melele xa tei e xil pusi xa ven memese, xi dilomun bemei vis Iesu, e di mikei be nesao e di pet rat his Hi ven. 16 Xi mitingeiril e pe met Iesu e misa memesien nan mini. E moletin ak be ngan Sameria, tave ngan Siu ti. 17 E Iesu misisi bitene, “Mutehe hexalu (10) iaxa vemim tememese. ?Ngan xil tesav xa labe hat e he sav (9) ladi xave?”

18 E Iesu misis moletin nan xil bitene, “Xi tave Siu ti. ?Veneh ma xi kestang dilomun bemei tengan misa memesien nan mi Hi?”

19 Ma Iesu biteni mi moletin ak bitene, “Mea, husil suse nam ha. Neketen nam misak ni vem memese.”

Melele xa Nat Moletin Itilomun En

Luk 17:20-37

20 Rut Parasi xil lasis Iesu labitene, “?Hi imei ihe suv toto na moletin xil vilieh?”

E xi bit rilomun ni mi xil bitene, “Hi misakras vastal e suse tova xa moletin xil lale kila. 21 Moletin ti misakras vahiteni vahitene, '!Hi be suv toto inggak!' mu '!Hi be suv toto inggaxor!' vengan xa Hi bit ihe suv toto e tinemim, e te meulien namim.”

22 Di, Iesu biteni mi moletin nan xil bitene, “Melengien ngan xil xa misa ti imei, e inou natara ti mun visal xamim. E melengien xil ak, iemim ti ihei tengan muti vahos vatel Nat Moletin rilomun, tave ti neta xa melengien vahit vahe tei takes. E musakras vengan xa tave melengien nan ti mu xa vamei rilomun en. 23 E moletin ngan xil lihiteni mi xamim lihitene, '!Mupus ti Nat Moletin iaxor!' mu '!Xi tak!' E xamim munake reitin ti e tumulen nae e munahusil xil ti. 24 Nabiteni mi xamim mak, melengien xa Nat Moletin itilomun en ixoni ngan xa an milangas e mileluv xol ut ngasen nggo rin tei ba duxoh rin tei mun. 25 E itiamu, xi ilong pangas pupu ni xi, e moletin xil te xosali ak lisin ni.

26 “Melengien na Nat Moletin ixoni melengien na Noah ^{▼▼17:26 Jen 6:5-8; 7:6-24} xa te tiamu, moletin xil latnavue xat xil ti. 27 E melele nen ak, moletin xil ngasen di langganien, di lamun, e di lateli ba duxoh melengien xa Noah be tuturil nan xa mahulong pupu, e oei mileh bemei pol, e vatakes, bas vin xil vus.

28 “Melengien na Lot ^{▼▼17:28 Jen 19:1-28} mun temak tang. Moletin xil ngasen di langganien e di lamun, di langgal e di lapos ni neta, di lapol ni naho e di lapol ni nim xil mun. 29 E melele xa Lot mea be reling moletin xil tahal Sodom, upang e hat xa minggan nggo nesao bemei e tan, e vatakes, ngga vin xil vus. 30 Ma Melengien xa Nat Moletin istal en vatei takes imak.

31 “E melengien nen ak, moletin tei xa di mingel pe vatiei tei, nava ti mun nim tengan valeh holesok nan xil. E moletin xa de naho, xi nahur ti mesal tengan vatilomun ha tengan vahur neta tova ra tim san. 32 Munem atou na Lot. 33 Xosxa moletin tei bit vahur xat meulien nan, ma ikesae rani. E xosxa imae ni meulien nan ikesae, ma moletin ak ihur meulien. 34 Nabiteni mi xamim, e melele nen ak, tiramue xal atou nan lalipat e rong tei takes, tei xalu Hi ihur rati ihe visali e ut nesao, e tei xalu ita. 35 Atou lu ti lalipol vituei ni anien, tei xalu Hi ihur rati ihe visali e ut nesao, e tei xalu ita. [ 36 Moletin lu ti lalipol e naho, tei xalu Hi ihur rati ihe visali, e tei xalu ita.” ^{▼▼17:36 Rut uvei xil xa te tiamu latamos ti e vas 36.}]

37 Sepinien nan misak ni moletin nan xil lasisi labitene, “?Suv, sexien xil ak listal ixo xave?”

Ma Iesu bit sepinien matu tei mi xil bitene, “Tuman xil xa lakes xil ni ‘volsa’ di langga xol rute tei xa neta tei mat da en.” ^{▼▼17:37 Vengan xa 'volsa' be tuman tei xa di ngga holesok xil xa lalel e labo. Mak, ma melele xa moletin xil lapus volsa xil di langga lakapis xol rute tei, lakila xa neta tei mat e bo da en. Ihusil sexien tak, holesok holu listal xa lipisen ni mi moletin xil rute xa Iesu itilomun imei en.}